1.plass til "I min hundehage"

Charlotte Inderhaug frå Tøndergård skole gjekk av med seieren i årets konkurranse for barn 

i Norsk Quilteforbund.

Ho er ei utruleg kreativ jente, og sa ja då eg spurte om ho ville delta. Det var nok meir arbeid enn ho var klar over, men eg trur ikkje ho angrar på innsatsen no.

Tema for oppgåva var "I min hage", og ho var fast bestemt på at det skulle vere både hundar og hundehus.

Det er veldig arbeidskrevjande å sy eit så stort teppe, og det måler ca 100x75cm. 

Ho hadde det som eit prosjekt der ho brukte timar i forming, valfag, matematikk og norsk, var av og til igjen etter skoletid, og hadde det med heim.

Planlegginga og utvelging av stoff og tilbehør er ein viktig del.

Innsatsen kan ikkje klagast på.

Bakstykket, som stikk fram i fronten, er dei gamle gardinene frå rektors kontor.

Skjæreutstyr er godt å ha.

Vi drog til Syskrinet når vi fann ut kva som mangla.

Hovud"personen" er Nala. Ho er sydd av pels frå Charlotte sin eigen hund. 

No ligg Nala og drøymer om mat og bein. Hundehuset er "lafta" og har never på taket. 

Eg viste frihandsquilting, og ho øvde litt på ein lapp, før ho quilta både på marka og skyar på himmelen. Blomstrane og boblene er også frihandsquilta. Veldig bra gjort med så lite trening.

Hundelenka er frå eit smykke.

Sola er frå eit gardinstoff, og ho har sydd band og perler på strålane.

Hengekøya er spent opp på pinnar, og med musikk og bok er det berre å nyte livet. 

I blomsterbedet pilar mus, som katten jaktar på. 

Detaljane er på plass, og boka har til og med fått sidetal.

Den minste hunden leikar med ballar.

Katten er stolt av fangsten, og musa er livredd.

Trebitane til stien er limt på.

Før pakking og innsending var det mange som ville studere og beundre.

Og eg og Charlotte er letta og glade for at ho kom i mål.

 Charlotte har lært nødvendige teknikkar undervegs, og det er ikkje tvil om at ho har anlegg for både quilting og andre formingsteknikkar. 

Her er frå utstillinga, og på lappen står det både nummer, namn og tittel.

Det var artig å overhøre kommentarane då eg gjekk rundt blant utstillingane. 

Sidan eg er medlem i Norsk Quilteforbund, og reiste som leiar i Molde Quiltelag, deltok eg på Norsk Quiltetreff i Kristiansand 20.-23.mars 2014.

Ekstra kjekt var det å kunne ta imot diplomen på avslutninga på vegne av Charlotte.

Og her er den glade vinnaren. No blir teppet sendt til ein stor quiltefestival i Birmingham i august, der det skal konkurrere mot barn frå andre land sine teppe 

Uansett kor det går, er det kjekt å ha slike erfaringar med seg.

Lykke til vidare!