søndag 30. desember 2012

Handlaga julegåver


Til jul fekk eg mange fine og nyttige gåver. No vil eg vise dei handlaga gåvene eg fekk. Eg blir så glad for all tid og omtanke som ligg bak slike gåver! Denne fine lysposen har ei venninne sydd til meg;)


Og sjå den nydelege gåveposen det låg i, saman med eit herleg knappehjarte! Janne er så flink!


Og god hjelp fekk eg under fotograferinga også;)


Så fekk eg desse flotte vottane med flinke Birgitte. Ho passar på å kle opp mor si med god og varm strikking;)


Og så fekk eg faktisk endå eit vottepar! Til bursdagen min fekk eg to luer av henne, og no fekk eg tilhøyrande vottar;) Her kan du sjå lueinnlegget.


I dag var det lilla settet i bruk. Og trur du ikkje at eg kom over DET fine tréet på turen! Så då blei det nokre greiner med heim til prosjektet mitt igjen;)

fredag 28. desember 2012

Pose til pepperkakeformer


Har sydd ein pose til å oppbevare pepperkakeformer i.


På det applikerte hjertet har eg sydd tekst på maskin med frihand. Det er no triveleg med song til bakinga;)


Ein liten detalj i kvar side;)


Posen blei pakka saman med kakeboks og former, og eit par former fekk pryde gåva;)

tirsdag 25. desember 2012

Til bunaden



I mai skal mine tre yngste tantebarn konfirmerast. To av dei er jenter og skal ha bunad. Til julegåve laga eg litt utstyr til oppbevaring av bunadane. Her er posar til bunadsølvet. Inni ligg det ein tett plastpose, for sølv skal oppbevarast lufttett. Engelen på Amalie sin pose liknar litt på henne. Og på Sara sin pose er to englar, for ho er tvilling;)


Eg har sydd tekst og konfirmasjonsdato på frihand med maskin.



Posen er pynta med blonder og sølvpynt.



I bandet i kvar side er det festa eit sølvhjarte.


Til sjølve bunaden har eg dekorert ein kleshengar med eit decoupagemotiv. Den andre hengaren er til skjorta, og er hekla rundt.


Den hekla kleshengaren er pynta med eit glashjarte og ein charm med "made for an angel".


I tillegg til kleshengarane og bunadsølvposen, fekk dei ein lang klespose for å henge heile bunaden i. Eg tenkte egentleg først å lage dette til konfirmasjonen, men fann ut at det var greitt dei hadde den til å samle utstyret i etter kvart som det blei ferdig. Håper dette er med å gjere det litt ekstra kjekt å finne fram bunaden til festlege anledningar i mange år framover;)

søndag 23. desember 2012

God jul til fuglane


Her stod det ei stor bjørk for nokre år sidan, og stubbane har vore stativ til blomsterkrukker. Men no er stammen innhol og mett av dage. Då fann eg ut at det var ein fin plass å sette fugleneket i. Det stod egentleg ganske stødig, men Ivar Hoel har spådd ny Dagmar 28. desember, så det var best å knyte neket fast i tilfelle han får rett.


Eg tok med ein Amaryllis på skulen for å måle vekst og følgje med i utviklinga. Det er mykje matematikk i blomster;) Eg har hatt mange Amaryllisar, og dei fleste får fire-fem klokker på kvar stilk. Men denne fekk faktisk åtte klokker, og det er no vel spesielt? Den velta før eg fekk ta bilete, så ei klokke ramla av. Og ei har ikkje sprutte ut endå.

No har eg berre ei natt igjen før julegåvene må vere ferdige, men eg kjem som oftast i mål... Tenkjer kvart år at eg skal starte tidleg, men får det ikkje til før det nærmar seg. Men eg kosar meg med juleaktivitetar i seine nattetimar. Det er så kjekt å lage små gåver og gi til andre.

Riktig god jul til deg som kikkar innom meg;)

fredag 21. desember 2012

Engleskare


Eg blei så betatt av nokre små englar på ein utanlandsk blogg, men sjølvsagt finn eg ikkje den igjen. Men eg har prøvd meg fram, og lagar no slike englar på min måte. Her kjem ei forklaring om du også har lyst å prøve.


Eg brukar band med ståltråd i sidene. Til skjørtet brukar eg ein bit på ca 18 cm, brettar den i små foldar, som eit trekkspel. Så klipper eg av øverste del og stiftar saman på toppen. Då kan skjørtet foldast ut.


Til vingene brukar eg ein bit band på ca 13 cm, foldar som trekkspel og stiftar på midten. Då kan vingane foldast ut.


Så brukar eg limpistol, og limar vingane til skjørtet, og ei perle e.l. til hovud. Her er det ein bit streng i perla, og ein sølvtråd er festa i den igjen som oppheng. Til slutt har eg festa på eit hjerte til pynt. 



Og når eg først var i gang, så blei det fleire englar som dala ned i skjul.



Ein heil skare faktisk. Nokre har reist som julekort rundt om i landet, andre har enda som premie eller små gåver. Dei er små og søte, og får innpass med dei fleste:) Og kanskje kjem det ein for å ønskje deg riktig god jul også.
                                        

tirsdag 18. desember 2012

Adventskalender til kollegaene



Eg likar veldig godt å lage små ting og gi bort i førjulstida. Denne siste veka før jul fekk eg så lyst å lage adventskalender til mine kollegaer. Dei er så mange at eg rekk ikkje å lage noko til alle, men eg ordna det som eit lotteri i staden, der dei som vil prøve å vinne ein av tinga kan melde seg på, og så blir to trekt ut kvar dag. Tre nøtter til Askepott er ei av gåvene. Vidare nedover er dei andre tinga.


Ein liten engel med utgangspunkt i eit sjokoladepapir frå fredagskosen.


To små englar laga av band.


Nålputer.


Boksar og glas med hekla trekk til lys eller diverse oppbevaring.
Nokre har allereie fått si gåve. Ho som fekk boksen med stjerne og lys, sa at ho skulle bruke den både inne, ute på trappa og ta med på tur og tenne lys i snøen ved bålet;)

Snart fyller bloggen min eit år, og då har eg lyst å gi gåver til mine kjære lesarar som legg igjen trivelege kommentarar. Det gjer meg glad;) Nyt dei siste adventsdagane!



fredag 14. desember 2012

Hemmeleg gåve til meg!


Eg blei den heldige vinnar av Tove sin hemmelege give-away i denne flotte eska. Ho har den fine bloggen Mosekonens puslerier, så besøk henne der! Veldig artig at vi begge har puslerier i bloggnamnet;)  Og så kjekt og spanande det var å få pakke frå Danmark!!


I posten kom ei stor eske, med mange fleire ting enn den hemmelege hjerteeska!! Det var klistremerker, glansbilder, oppskrifter, lakrismandler (som ho har oppskrift på i sin blogg;) drops, poser og kinesiske helsekuler/ yin og yang kuler.


Kulene låg i ei fin eske og lagar klokkelyd når dei rullar i handa. Dei skal virke helbredende på mange ting.


Og i ei julegåve var det ein brun tørka klump, som eg ikkje forstod kva var. Tenkte at ho sendte den med fordi ho hadde sett at eg brukar ting frå naturen i syinga;) (Her er "klumpen" akkurat lagt i ei skål med vatn.)


Men så opna eg eit fint ark, og der stod forklaringa. Det var Jerikos rose som låg i dvale, og det stod korleis eg skulle få liv i den igjen. Det var også ei artig forteljing om historia til denne ørkenplanta;) Her har den trekt vatn nokre timar. Det skal bli kjempekjekt å følge med i utviklinga!
Tusen takk for alle dei fine og kreative tinga, Tove!

torsdag 13. desember 2012

Koseleg blogg-gåve


Sjå alt det fine eg fekk av Margrethe gjennom bloggen Quiltegleder fordi ho fekk hjelp av eit tips eg gav!! Kjempekoseleg å få førjulspakke i posten;) Og i det fine heimlaga stjernekortet var det ei triveleg julehelsing.


Der var ei samanleggbar saks og ein hekla blomst.


Eit herleg lite nissepar med så fine detaljar. F.eks. lykta i handa til gubben, er av tråd og ei firkanta perle.


Ei lita symappe til handveska. Det er fine detaljar brodert på, men det er ikkje så lett å sjå.


Inni er det plass til ei lita saks, nåler og litt tråd. Og eg fekk no mange herlege fargar med brodergarn også;)
Tusen takk for den kjempefine gåva eg fekk, Margrethe! Eg anbefalar alle å sjå på alt det fine ho lagar. 
Bloggen hennar finn du her.

onsdag 12. desember 2012

Historisk dag


Hei! Må berre stikke innom ein liten tur for å markere den historiske datoen, og dette er vel siste gongen vi har slike magiske datoar i vår tid. Men vi får no 20.12.2012 snart då;) Det var rekordmange som gifta seg i dag. 53 par i Oslo, mot normal 3 til på ein vanleg onsdag, Og tenk på dei nye borgarane som ser dagens lys i dag;) Litt av ein fødselsdato dei kan skilte med!


Og magisk er det ute for tida også;) Om eg går berre nokre meter frå huset, føler eg at eg går rett inn i eventyrland.


Og alle lydar er pakka inn i vatt. Ta deg tid til å nyte stillheita i adventstida;)



søndag 9. desember 2012

Kaffifromasj


Her kjem mi oppskrift på Kaffifromasj som eg lova. Oppskrifta har eg fått av svigermor, og har vore laga mang ein gong. Den fell i smak hos både store og små.

Før du startar på sjølve fromasjen:
Legg 6 plater gelantin til bløyt i kaldt vatn, og sett 1 dl sterk kaffi til avkjøling.
Pisk eggedosis av 3 egg og 100 gr sukker.
Varm litt av kaffien og smelt gelantinen i den. 
Pisk blandinga i eggedosisen saman med resten av kaffien.
La det stå og tjukne litt. Snu litt rundt med ein slikkepott av og til, så ikkje kaffien synk ned.
Pisk krem av 4 dl fløte.
Grovriv eller hakk fint 1 plate kokesjokolade.
Bland det heile lett med ein slikkepott. Når det har stivna så mykje at kaffien ikkje synk ned, kan alt hellast i ei skål. Pynt gjerne med litt sjokolade.


Fromasjen blir lett og luftig, og forsvinn fort. Mange kallar den nok for Mokkafromasj.
VELBEKOMME


Eg er så glad for at eg knipsa kald kunst i naturen i går, for i dag tidleg var det ut og måke snø. 
Denne dompapen fekk plass ved inngangen i går, og har ly under taket. Riktig god 2. advent til mine kjekke lesarar! Nyt førjulstida og bruk dine kreative evner mellom andre gjeremål;)

lørdag 8. desember 2012

Vakkert


Plassen, som er det nye jazz- og kulturhuset i Molde, har eit nydeleg lysande tre i trappa som blikkfang.


Eg beundra det kvar gong eg kjørte forbi, og no ein dag måtte eg betrakte det på nært hald.  Sidan det er plassert høgt i den lange trappa, er det synleg både frå gatene nedanfor og ovanfor. All ære til den kloke hjernen bak dette kunstverket!


Vi har også hatt ein nydeleg haust og vinter så langt. Det har vore mange minusgrader og barfrost i lang tid. Og jammen har det gitt naturen mange kunstverk også!


Det er så praktfullt å sjå naturen i rimdrakt. 
Og ekstra fint er det når solstrålane får minusgradane til glitre.




Tenk at vanleg singel kan vere så vakkert.


Rimfrosne skiferheller.


Hagedammen er heilt botnfrossen.


Eg stod lenge og beundra naturens kunstverk i dag, og noko av det måtte forevigast.

LinkWithin

Related Posts Plugin for WordPress, Blogger...