onsdag 26. februar 2014

Ingrid Surprise

Etter førti år har eg igjen fått kontakt med ei barndomsvenninne, og det er såå kjekt! Og det var både tilfeldig og overraskande at vi fann kvarandre no. Ingrid såg eit lite intervju med meg i avisa, og såg der at eg hadde same arbeidsplass som hennar dotter. Eg kjem aldri til å gløyme øyeblikket då dottera sa: "Mamma har så lyst å treffe deg igjen." Og eg var som eit spørsmålstegn lenge etter avsløringa. Snakk om å bli overraska! Men eg tok kontakt med ein gong eg kom heim, og vi avtalte treff.
Og på søndag blei det eit nytt treff med Ingrid og faren heime med mi mor.


I den anledning komponerte eg ei fromasjkake, og her er oppskrifta om du også vil lage den. 
Eg kjem i alle fall til å lage den igjen, og utifrå denne kjekke gjenforeninga blei namnet:

INGRID SURPRISE

Legg 7 plater gelantin i blaut.
Pisk 5 dl fløte til krem.

Pisk eggedosis av 3 egg, 100 g sukker og 2 ts vaniljesukker.
Press safta av ein appelsin.
Varm opp litt av safta, og la gelantinen smelte der. 
Tilsett appelsinsafta og gelantinen i ein tynn stråle i eggedosisen samtidig som du piskar.
Tilsett ei pære i bitar, ca ein kopp blåbær og 100 g Firkløver i bitar.
Bland inn kremen til slutt.

Sett ringen av ei kakeform på eit fat og fyll fromasjen oppi.

På toppen av kaka hadde eg eit gelelokk av eit beger rørte jordbær og 3 plater smelta gelantin. 
Når alt er stivna, er det berre å skjære rundt ringen og servere.

Lykke til!



mandag 24. februar 2014

Overraskande og praktisk gåve


I dag fekk eg ei overraskande pakke i posten, og inni var denne flotte Sytrådhaldaren med nålepute og oppbevaringsplass til både det eine og det andre. Og det var med eit fint kort frå lappe-Grete med takk for mitt bidrag til aksjonen ho hadde for å skaffe pengar til forskning på brystkreft. 
Men det er no Grete sjølv, som verkeleg har stått på i over eit år, som skulle hatt både takk og gåve!

Eg arrangerte eit adventskalenderlotteri på arbeid, og kollegaer bidrog med både premiar og lodd, så til saman kunne eg overføre kr 3030,- til aksjonen. Det er godt å kunne hjelpe.


Sjå på dette flotte handverket! Dreia treverk med innfelt nålepute av trådsnellestoff og 13 messingpinnar til trådsneller. Tungt, stødig og solid. Gjett om dette blir brukt! Og så er det kjekt å frakte med seg frå syrommet til sofaen når lukkekantar og anna skal syast.
Tusen, tusen takk, Grete! Eg blir heilt matt.

torsdag 20. februar 2014

Sommarfuglar i regnbogedrakt


Sommarfuglar er herlege vesen, som stille og roleg flyg rundt og gleder både deg og meg. 
Eg trur alle blir glade av sommarfuglar, og at dei har berre godt med seg;)
Det fins faktisk omkring 170.000 ulike sommerfuglartar, og her i landet er det over 2000 artar. 
Så då tenkte eg at det må vere plass til nokre i regnbogedrakt, -eller regnbokeprakt også. 
Framgangsmåten for heklinga fann eg på denne fine bloggen


Eg har ikkje bestemt meg heilt for montering endå, så dei får berre sveve litt rundt ei stund.


Ein liten smak av sommarfugl i vinterland blei det også.

Tusen takk for dei fine kommentarane de legg igjen. Dei både gleder og varmar;)

søndag 16. februar 2014

I det våte element


I rein lykke over at det endeleg kom nokre regndråpar her, var dette teppet det første som slo meg. Det sydde eg til badet i 2006. Og sidan eg viste det i eitt av mine første blogginnlegg, så er det nok dei fleste av mine følgjarar som ikkje har sett det endå. Derfor inviterer eg til eit lite dykk i det våte element. 
Og at eg skal juble over litt regn, seier noko om kor tørt og varmt det har vore her heile vinteren! 


"-.-.-.- nå har vi det 


som fisken i vannet .", var ei strofe som ofte surra rundt i hovudet etter at eg kjøpte batikkstykket med fiskar av Silvi. Eg var også inspirert av eit teppe i eit utanlandsk quilteblad, men det finn eg ikkje igjen. 
Eg ville ha ulike kantar og prøvde å dra fargane frå midtstykket ut til sidene, samtidig som eg ville dei skulle ha ein samanheng. Her går det mest i blå-grøn.


På andre sida skiftar både fargar og teknikk, og qultinga er tilpassa dei ulike stoffa. 
Det er ein sjøhest i den ytterste ramma, men den er ikkje så lett å få auge på.


Eg er veldig glad i frihandsquilting, og har prøvd å byggje vidare på formene i motiva.
Det er mykje quilting på fiskane også, men det viser ikkje så godt her.


Teppet skulle også passe til dei blyglasetterliknande vindauga vi har på badet. 
Det var mange arbeidstimar på teppet, men etter fleire år er eg framleis fornøgd. 

Like fornøgd er nok ikkje dei norske staffettkarane der dei akkurat kjempar i Souchi. 
Er det skiløparane, eller er det smøreteamet som ikkje får det heilt til?

Og før eg er ferdig å skrive, skin sola igjen. Med bar mark og 7-8 grader treng eg ikkje å tenkje på anna smøring enn litt solfaktor. Men forhåpentlegvis kjem det meir regn etter at eg er ferdig med turen, slik at brannfaren blir mindre, at dyra finn vatn, og for at vi ikkje treng å vatne uteplantene meir denne vinteren;)

søndag 9. februar 2014

Nyttårsball


Etter ønskje frå elevar og foreldreutval arrangerte Tøndergård skole og ressurssenter nyttårsball for første gong. Både gruppene og dei vaksne fekk kvar sine oppgåver, og eg kom i pyntekomitéen. Vi blei enige om at det skulle pyntast skikkeleg for å gjere stas på elevane. Ein assistent, som er såå kreativ og flink med mykje, fekk i oppgåve å lage plakat. Ho teikna og måla saman med ein elev, og plakaten blei kjempestilig.


Her er borda på formingsrommet fylt med flotte bokstavar i lange baner.


Og slik blei det til slutt med konturar, glitter, 


murvegg


og edderkoppspinn. 
Omkransa av ballongar, så blei plakaten eit skikkeleg blikkfang.


Gymsalen blei også pynta med lys, girlander,


tøffe og fargerike serviettar


og vasar med roser.


Ribbeveggen blei dekt med lys og papirroser. 
Bord og stolar bakerst i salen, og lydanlegg og danseplass fremst.


Her kunne glade og stivpynta elevar bli foreviga. 
Festen blei veldig vellykka, så dette blir nok ein tradisjon. 
Polynese, dans, leikar, konkurranse og servering skapte stemning for både store og små.





søndag 2. februar 2014

Hjelpeforkle og lykt


Mor mi har tatt hofteoperasjon og følte seg veldig hjelpelaus med to krykker. Ho er vant med å ordne alt sjølv, så det var veldig frustrerande å ikkje få med seg nokon ting. 
Så var det nokon som sa til meg at eg kan no lage noko praktisk å bære i. 
Då blei det eit kraftig forkle med lommer.


Ei stor lomme fyller nesten heile fronten, og ei mindre lomme til småting utanpå der igjen. 
Eg applikerte på nokre stjerner for å kvikke opp litt.


Eg laga litt rynker midt foran for at det skulle bli meir lommeplass.
Og så blei det plass til ein liten sommarfuglknapp i skjøten av linninga:)


To kraftige kjøkkenhandkle blei forvandla til eit hjelpeforkle. 
Det blei vanskeleg å knyte på seg forkléet, men mor knytte endane saman og hengte det over skuldra når ho skulle bære med seg ting. 
Dette var før jul. Men no greier ho seg nesten utan krykker inne i huset, så då er alt så mykje betre;) 
Men eit forkle med lommer kan no vere praktisk om ein ikkje brukar krykker også;)


Eg var den heldige vinnar av denne fine lykta frå Kremmerhuset då Wendy hadde give-away. 
Sjekk den koselege bloggen med det stilige namnet Ineteri-gjør det selv . 
Og saman med lykta fekk eg små og søte vedkubbar. Trur ho veit at eg er veldig glad i ting frå naturen;)


Og vedkubbane kan ligge inni lykta dersom eg brukar ledlys. 
Med alle brannane som har herja i fleire samfunn den siste tida, så kan vi nesten ikkje vere forsiktige nok.


På verandaen ligg ein liten snøflekk, så eg kunne lurt mange til å tru at det er full vinter her, dersom eg hadde beskjært bildet. Men det er det altså ikkje! I skrivande stund er det 9 plussgrader, og vi har nesten ikkje hatt nedbør i heile januar. Vegane er bare, og det er veldig tørt ute. Det er ikkje ofte eg ønskjer nedbør, men det trengs verkeleg no. 
I kveld skal lykta prøvast. Tusen takk Wendy!



LinkWithin

Related Posts Plugin for WordPress, Blogger...