Sløyfer og kjekke ting

Her er ei spent jente på 3,5 år med fotografen for første gong. Det var saman med min eldre bror og søster hausten 1962. Mine to yngre brødre var ikkje født endå. Mor var flink å sy, og ho hadde sydd kjolar av likt stoff til meg og mi 10 år eldre søster, som så tragisk omkom nokre månader seinare. Eg fortalte litt om det i starten av dette innlegget.

Legg merke til den flotta sløyfa eg har i håret! Det var veldig vanleg når vi skulle pynte oss den tida;) Eg hugsar at dei var av nylon, og endane var klipte på skrå og litt smelta med ei fyrstikk for at dei ikkje skulle rakne.

Og no kjem eg igjen tilbake til mitt flotte trådskåp. Då eg fekk det, låg det bl.a. sløyfeband i ei av skuffene, og der har det sikkert vore i femti år, for hårstrikk tok over for sløyfene i tidleg barneskulealder. Men kanskje dei kjem til heder og verdigheit igjen snart? Sløyfebandet eg hadde då eg var med fotografen, er nok kjøpt her. Beltebandet på kjolen var også knytt i ei sløyfe bak.

Og i ei anna skuff låg det andre kjekke ting. Fremst til venstre ligg tversoversløyfer, som eg hadde med i dette innlegget.

I sløyfeskuffa har eg no samla blondar og band.

I den andre skuffa var det større bur, så der har grovare band o.l. fått plass.

Og etter knappesorteringa var det ei skuffe igjen i det minste skåpet. Der blir det plass til diverse ting og tang. No har eg nok vist og frista med det meste frå mitt skattekammer. Har du ikkje sett det første innlegget om trådskåpet, så er det her. No er det på tide at eg får opp produksjonen, for eg kan i alle fall ikkje klage på at eg ikkje har noko å lage av;)

Brødkorg

I innlegget om stiving av hekledukar, viste eg bl.a. denne fine heklebrikka frå mor.

No vil eg berre vise at eg endeleg har funne den perfekte brødkorga til, -på Nille;)

Jannes kreative verden

Dette innlegget er reklame for min yndlingsblogg; Jannes kreative verden.

 Janne er så kreativ og produktiv at det går nesten ikkje an! Stikk ein tur innom henne, og du blir garantert inspirert;)  For kort tid sidan opna ho også ein bloggshop, og eg måtte berre prøve den. Derfor sendte eg ein mail og bestilte posepose nr 2. Produkta er fine, og eg likte så godt at ho opererer med pris inkl. frakt. Då var det berre for meg å overføre på konto, og kort tid etter kom pakken i posten;) Dei to første fotografia har eg kopiert frå hennar bloggshop;)

Eg likar veldig godt både blomster og tekst.

Men i pakken låg også dette fine skiltet! Tusen takk, Janne!!

Eg lurer på om det kanskje er ei gåve fordi eg blei hennar første kunde;)

Og dette koselege kortet var også med;)

Til slutt skal du få endå ein god grunn for å besøke denne kreative dama:

I helga legg ho ut ein give-away for å feire at 100.000 har vore innom bloggen hennar.

Eg gleder meg, for den blir sikkert like bra som alt det andre ho styrer med;)

Eplet fell ikkje langt frå stammen

Ein god nabo runda år, og sidan han er flink å fyre med ved, fann eg ut at ein tennbrikettboks kunne passe. Og eg skal no utforske sying med naturmateriale, så eg klipte greiner av epletreet og sydde dei fast;) Etterpå blei ulike perler sydd på som epler.

Eg sydde på "Eplet fell ikkje langt frå stammen", og pynta med band og ein sommarfugl.

Og her ser vi eplet ved stammen.

Håper at boksen vil spre glede og varme;)

Mange minner i knappar

Knappar har eg vore glad i heilt frå eg var lita. Og dei gamle knappane er framleis kjærast og finast. Dei vekkjer mange minner. I dag er det 49 år sidan søster mi sklei og døde under ein fjelltur. Ho blei lagt i kista på 14 årsdagen sin. I morgon ville ho ha fylt 63 år.

Eg var berre 4 år då det skjedde, og eg saknar henne veldig. Tenkjer på alt vi kunne ha hatt og gjort saman. Ho likte også å lage ting med hendene. Sjølv om eg var lita, hugsar eg ein del ting, og ho var ei snill storesøster. Eg fekk f.eks. ofte vere med henne til butikken.

Og det var til den butikken eg fekk det flotte trådskåpet eg skreiv om her.

Og saman med tråden, fekk eg også desse fine gamle knappane;) For ein skatt!

Knappane var støvete og lukta gamalt, og heilt sidan eg fekk dei i hus i sist sommar, har eg tenkt på kva og korleis eg kunne reingjere dei. No har vi hatt nokre fineversdagar, og eg tok fatt på arbeidet. Eg fylte litt knappar i ein vaskepose, og rista dei skikkeleg rundt i varmt vatn med flytande Ajax sitron oppi. Etter kvart tømte eg dei utover i boksar og på bord.

Og så lot eg sola stå for tørkinga;)

Tida går når kvar knapp skal beundrast;)

Og når eg først var i gang med knappesortering, så tok eg også fram knappane som eg har samla meg frå eg var lita jente. I det omtalte silkespole-skåpet frå innlegget om tråd, var det skuffer med mange små rom. Perfekt til sortering av knappar;)

Og det var visst litt det også.. Ein del er frå ein konfeksjonsfabrikk som blei lagt ned ca 30 år sidan. Eg synest at knappar er så fint!

Her er knappane fordelt i to trådskuffer;) Og det er eitt ledig bur (endå) i kvar skuff. I kvar ytterkant er silkespolane som pyntar fronten av skuffene. Eg er ikkje (t)rådlaus, og blir nok heller ikkje knappelaus med det første... Dei kvite knappane fekk ikkje plass, så dei små og store fekk kvar sitt glas.

Skuffene er på plass i det øverste skåpet, og knappar som ikkje blei med i sorteringa, får pryde toppen. I den nederste skuffa er det andre ting, men det skal du få sjå seinare;) Kanskje du blei endå meir misunneleg på skåpa mine no?

Veske

For nokre år sidan fall eg pladask for ei veske på Quiltegården i Trondheim.

Den var stitchet med eit motiv frå ei japansk bok, og kombinert det med eit fløyelsstoff . Det var ikkje mønster til veska, men eg fekk lov å herme. Eg herma med fargar og motiv, men laga ein anna fasong på veska.

Motivet er sydd med svart tråd, og kattane er applikerte på med tungesting.

Fløyelstoffet er rynka på broderiet.

Det er stitchery rundt heile veska, og pga rynking og sydd botn, er det bra plass i veska.

Her er eine sidekanten.

Hankane er festa på med hemper. Kanten oppe er dobbel med vatt mellom,

og foret er også rynka på.

Eg likar godt denne veska, og eg brukar den i ulike samanhengar, for den passar til mykje;)

Pølseform

Pølseform er ein enkel rett å lage. Den er ganske sunn og smakar veldig godt.

 Har du lyst å prøve, så får du oppskrifta her;)

Smør ei stor form eller ei langpanne. Legg i bitar av pølse, løk, paprika, blomkål,

gulrot eller andre grønsaker. Mais er også godt oppi.

Mengde av kvar sort er alt etter kva du har og kor mange som skal ete.

Legg potetskiver oppå der igjen, og slå over ein saus som er rørt saman av tomatpurre,

fløte, vatn, salt, pepar, timian og basilikum, eller andre krydder du likar.

Den skal vere tjuktflytande. (Du kan også bruke posesaus og røre ut den med vatn og fløte).

Hermetiske tomatar er også fint å bruke i sausen. Dekk med skiva eller reven ost på toppen.

Sett forma nederst i omnen, og steik ved 200 grader i 30-40 minutt, til potetene er møre.

Velbekomme;)

Vil du vinne?

Birgitte, med bloggen Birgittes forglemmegei, har denne fine premien i sin første GiveAway.

Har du lyst å vinne tre garnnøster og ein heimsydd pung, er det berre å prøve lykken!

Likar du strikking,

hekling,

 

scrapping,

 

sying, quilting,

 

eller hund, så vil eg anbefale å kikke innom Birgittes forglemmegei;)

Der er det mykje inspirasjon å hente;)

Haustlauv

Dette veggteppet blei sydd til min brors 50 års-dag for ein del år sidan.

Han er eit haustbarn, så derfor tenkte eg at haustlauv kunne passe. Det blei ferdigstilt rett før vi skulle reise, og eg måtte bruke den vatten eg hadde. Den var for tynn, og det irriterer meg kvar gong eg er på besøk, for det heng for laust nederst. Trur eg må prøve å fikse det.

Eg brukte ulike fargar til blad, ramme og lukkekant, og det blei eg veldig fornøgd med:)

Stilkane er applikerte på. Bakgrunnen er frihåndsquilta ganske tett, 

og inni kvart blad er det sydde nervar med gulltråd.

Hjørna er avkutta med ein farga trekant, og det er sydde gullstikningar på ramma.

Pakke frå "Hvite blonder og Myke karameller"

Eg fekk pakke i posten i dag!! Premien min frå snille Heidi;) Nydeleg pakke og koseleg kort.

Og inni pakken var det to kjempefine lysglas og ein pakke serviettar. Tusen, tusen takk!

Heidi har den fine bloggen med det herlege namnet "Hvite blonder og Myke karameller".

No har ho ny Give Away igjen, så då er det endå ein grunn til å kikke innn HER.

Puteutfordring

 

Mor Inger`s Hus tipsa om puteutfordringa til Fabelaktig, "Vis meg din favorittpute". Du kan sjå den fine bloggen til Fabelaktiv og lese meir om utfordinga her.

Mor Inger viste ei nydeleg pute som mor hennar hadde laga. Eg vil vise ei pute som datter mi har laga;) Den var julegåve frå Birgitte for vel fire år sidan, og er så nydeleg utført! På bloggen ho hadde då, skreiv ho dette;

Til mamma og pappa så har jeg sydd en julepute. Denne ideen fikk jeg etter å ha kikket i en panduro-katalog. Her har jeg stitchet et Tilda-motiv med engler i ulike nyanser av rosa. Skriften over "mercy and bright" har fått en brun farge. Jeg har brukt et rødt stoff innerst for å ramme inn stitcheriet, og et lysebrunt stoff med røde detaljer ytterst.

Høgt på ei grein

Eg har lova å kome med meir etter omsnuing og forandring på soverommet. Det prosjektet eg hadde i tankane då, har ikkje blitt gjort endå, men det skal bli;) Det går ikkje så fort i svingane, men planlegginga er no også viktig;) Men i går fekk eg laga noko anna til soverommet, nemleg ei svartmåla grein med sølvfuglar på.

Eg sette greina i snøen, som uventa lava ned til påske, og spraya på.

Og sidan det var litt sol, tørka det kjapt.

Greina startar på toppen av skåpet her.

Møblane er så lyse, så blomstrane forsvant mot bakgrunnen.

Eg festa så ei remse av tynt stoff nedover skåpsida og bortover kommoden. Med Glue-dots (for scrapbooking) på toppen av skåpet og nede i overgangen, gjekk det fint;)  Ein fugl fekk plass oppi her også;)

Biletet, som eg viste her, har foreløpig fått plass over kommoden.

Og har du lyst å sjå første innlegg frå soverommet, kan du gjere det her.

Tips om stiving og strekking

Denne koselege heklebrikka har eg fått av mor. Eg har endå ikkje funne det perfekte brødfatet å ha den i, så den kjem ikkje heilt til sin rett under bruk. No er den nyvaska og stiva, og eg skal tipse deg om ein veldig grei måte å gjere det på;)

Dukar som er hekla eller strikka, kan stivast med skumma mjølk. Det har eg lært av mor, og det fungerer;) Hell litt skumma søtmjølk i ein bolle, og legg den våte duken oppi der. Snu litt rundt så alt blir dynka, og vri den godt opp etterpå. NB! Duken bør vere våt av vatn først, elles blir den for stiv. Strekk duken utover på eit flatt underlag, og la den ligge til den er heilt tørr.

Og så skal du få eitt tips til;) Nille har slike golvpuslespel av skumplast, og dei kan setjast saman så stort du treng. Her kan du strekke dukar, sjal, små strikkaplagg o.l. Det er lett å stikke nåler i, og eg brukar slike korte kartnåler / "map pins". Her har eg stiva mange dukar samtidig, og dei som som er laus i kanten blir festa med nåler. Dei andre berre strekker eg lett med hendene og drar kantar o.l. ytterst, slik at det ligg fint. Og du lurer kanskje på om det blir surlukt, men tørka mjølk luktar ikkje;)

Eg likar veldig godt denne metoden, for då slepp eg å dampe eller stryke dukane og dei ligg fint.

Men som ei oppklaring; eg brukar ikkje mjølk på klesplagg altså!! Dei er berre fukta med vatn;)

Påska er på hell, men eg tek med litt frå inngangspartiet likevel;)

Velkomne til oss;)