Små snurrepip-piper

Eg er glad i å skape mitt eige, og eg likar å skrive fritt med symaskina. No går det på små kreasjonar med fuglar på, og eg prøvar meg fram med ulike måtar å montere på. Saman med datter mi har eg meldt meg på markedet, som Øyriket i Romsdal skal ha i Molde 21. september, så då er det berre å stå på framover.

Motiva er sydde på ullfilt. Her er det montert på ein bakgrunn av lin.

Knappar, band og pinnar er også artig å bruke.

Eg er veldig glad i stein, men det er no ikkje så anvendeleg til slikt bruk då;)

Idéar til nye produkt står i kø, men så er det det med tid og overskudd til å produsere då...., men eg har veldig lyst;)  Og så skulle eg gjerne ha visst kva folk er interessert i å kjøpe.

Kort og premie

 

Eg sydde eit kort til eit par som gifta seg i dag. Det er ei stund sidan eg har brukt ting frå naturen no, så då blei det eit tre med eit stort hjarte for brudeparet, og små perlemotiv for kvar av dei fire barna.

 

Og innpakninga var enkel og grei; -hankane på ein papirpose samanknytt med sløyfer.

 

Og så må eg vise premien eg vann på den fine bloggen Dollan Design. To skikkelege sydamestoff med ein koseleg lapp frå Sverige;) Men det var flaut at ho måtte etterlyse meg, for eg har vore så lite innom bloggar i sommar, at eg fekk ikkje med meg at eg hadde vunne ein gong! Tusen, tusen takk Dollan!!

 

No er sommaren på hell, og dei siste rosene for året er plukka inn.

Smil til verden

Eg fekk så lyst til å sy eit oppmuntringskort til ein god kollega.

Det kan vere kjekt å kikke på noko fargerikt på kontoret.

Ein bokstav blei borte i syinga, men den er fiksa etter fotograferinga;)

 

Fuglekort

Vesle fuglen er ute på tur for første gong.

Den nippar korn og nippar strå.

 

 

Og hev så god ei lune, og ler åt katten grå.

 

Men det er ikkje så lett for ein liten skapning med tynne bein å vakle seg rundt i vekstene,

 når nebbet er stort og stjerten strittar alle vegar.

 

Men det var no gøy å lage slike kort,

så det blir nok fleire:)

 

Teskeikjerringa

-Åhh nei og nei!! Så skjedde det igjen! Og sjølvsagt med det same mannen drog på tur.

Dette skal bli litt av ein dag igjen.

-Eg skulle berre gje blomstrane vatn, og så fekk dei meg i staden;(

-Ja, ja, -med litt hjelp så får eg meg ein tur i hagen likevel.

Rosene veks bokstaveleg talt over hovudet på meg no.

-Men du så kjekt å kunne nyte både syn og duft på nært hald;)

-Morellene må plukkast, men eg må vente til eg blir stor igjen, og til mannen kan hjelpe meg å få av nota. Lagar eg ei lita opning no, så kjem vel fuglane og tek både meg og bæra. Og tenk om mannen finn meg i eit fuglereir saman med andre verdisaker. Det skulle ha blitt folkesnakk det!!

-Kanskje eg heller skal ta meg ein dukkert i dammen.... Nei, for risikabelt, eg blir vel dratt rett inn i pumpesystemet, og då finn ikkje mannen meg før han begynner å leite etter feil i systemet.

-Det ordnar seg nok denne gongen også skal du sjå.

-Eg får berre nyte utsikta og insekta så lenge.

-Eg likar meg i alle fall her saman med denne nydelege engelen frå ei like herleg dame.

Her er det trygt, godt og avslappande. Sjå kor snill den er då! Det er så koseleg å gå forbi den sjølv om eg er liten eller stor.

Ja det var Teskeikjerringa frå hennar eige perspektiv.

Eg vaks opp med Alf Prøysen og hans fantastiske tekstar i songar, eventyr og forteljingar,

-og ikkje minst dei herlege historiene om kjerringa som plutseleg blei så lita som ei teskei i dei mest utrulege samanhengar.

Ei anna dame eg beundrar er Tone Finnanger og hennar herlege bøker. Ho er også glad i eventyr, og det er ho som har laga mønster til denne Teskeikjerringa, som eg fall pladask for med det same, men ikkje har laga før no. Du finn henne i boka Tilda Vintereventyr.

Møte i regnbogeregn

Symaskina ut på verandaen, betyr sommar for meg. I år tok det lang tid før maskina fekk frisk luft, men du så kjekt det var.

Og det som inspirerte meg, var flekkar med regnbogefargar på sofaen

og på teppet. Vakker lysbryting når sola skein inn. Og det inspirerte meg til å sy regn i finevéret!

Motivet til denne vesle quilten fann eg i siste nr av Quilting Arts Magazine. 

Terry Ask frå Canada har sydd ein quilt som heiter "Rainy Day People 4".

Eg ville prøve å få fram eit varmt møte i vakkert og fargerikt regn.

Første tur enda rett oppi blomsterkrukka.

Det er no sommar!

Quiltinga er berre rette saumar med sølv- og fleirfarga tråd i svart/grå.

Så er det å prøve seg i det våte elementet.

I

I`m walking in the rain.. 

Skulle gjerne ha visst kva dei snakkar om. Kanskje om dei vakre fargane i regnbogen?

Dagens skattejakt

I dag blei det både ein sykkeltur og ein avstikkar til fots. Som vanleg går både auge og hjerneceller i alle retningar når eg er ute i naturen.  Jaktinstinktet etter skattar og idéar blir automatisk kobla inn. Til og med skuggen på vegen inspirerte meg i dag!

Og her er skatten, som var så stor at den sopa i vegen når eg sykla. Men eg kunne ikke knekke av noko av desse vakre greinene:) Det var nok mange som rista på hovudet når dei såg sopelimen eg hala etter meg. 

Dei ventar nok berre på å sjå at eg lettar og flyg avgårde snart:)

Jakka blei ofra for å sikre den dyrebare lasten.

Du greier nok ikkje å gisse kva inspirasjon desse greinene ga meg! Men om eg får til det eg planlegg, så skal du få sjå:) :) Om eg ikkje har flydd avgårde då!

Og planar har eg med hjarta også. Eg blir like glad kvar gong eg finn eit nytt. Var ikkje dette vakkert?

Og dette hjartet låg midt i stien og viste veg.

Men aller mest sjarmert blei eg av dette værbitte hjartet i ein gamal stamme som låg på bakken. Til meir eg studerer det, til fleire figurar dukkar opp inni hjartet, -både folk og dyr:)

Det er forresten mykje å markere på bloggen min no, som akkurat har runda 1 1/2 år. 

Eg har fått 200 følgjarar. Hjarteleg velkomne til alle!

Eg har runda 200 innlegg,

og fått 2500 kommentarar.

Og straks rundar eg 60.000 bloggbesøk. 

Dette sett eg stor pris på, og vil markere det med ein give-away i løpet av sommaren.